У верасні і кастрычніку ў Батумі, Варшаве, Вільнюсе і Беластоку адбудзецца штогадовы фестываль інтэлектуальнай кнігі PRADMOVA. Праграма з’явілася на сайце арганізатараў.
Фестываль стартуе ў грузінскім Батумі (30 верасня — 1 кастрычніка). Госці змогуць атрымаць асалоду ад лекцый, літаратурных дыскусій і «Паэтычнага варушняка». З падзей адзначым прэзентацыю кнігі «Беларуская нацыянальная ідэя 3: на вайне» з удзелам пісьменнікаў Стася Карпава, Святланы Курс і Аляксандра Чарнухі, а таксама інтэрактыўную лекцыю «Песні беларускага супраціву» з удзелам Змітра Бартосіка і Змітра Зайко.
Наступным прыпынкам стане Варшава (6−9 кастрычніка). Тут удзельнікі фестывалю змогуць сустрэцца з вядомымі аўтарамі, паразважаць пра нацыянальную ідэю і будучыню тэатра, паглядзець і абмеркаваць з аўтарамі і рэжысёрамі тэатральныя пастаноўкі, а таксама наведаць вялікі канцэрт беларускай музыкі. З падзей адзначым дыскусію-прэзентацыю кнігі «Чаму Беларусь не Расея?» з аўтарам Сяргеем Абламейкам. Прэзентацыя зборніка апавяданняў Альгерда Бахарэвіча «Ператрус у музеі» і беларускага перакладу дакументальнай кнігі «Мінскі дзённік. 2020−2021» Юліі Цімафеевай. А таксама прэзентацыя першай анталогіі беларускага гей-пісьменства «Мальцы выходзяць з-пад кантролю» з удзелам выдаўца Ігара Іванова.
Потым PRADMOVA адправіцца ў Вільнюс (14−15 кастрычніка), дзе адбудзецца дыялог беларускай паэзіі з паэзіяй краін Балтыі. З падзей адзначым лекцыю-прэзентацыю будучай кнігі «Іншая гісторыя савецкага беларускага кіно. Даследчыя сюжэты» і дыскусію «Літва ці Летува: спрэчныя пытанні беларуска-літоўскіх стасункаў у гісторыі і феномен ліцвінізму».
Фестываль завершыцца ў Беластоку (28−29 кастрычніка), дзе літаратурныя сустрэчы будуць спалучацца з абмеркаваннямі, прэзентацыямі кніг і дыскусіямі. З падзей адзначым лекцыю Марыны Казлоўскай пра «Дзікае паляванне караля Стаха» Уладзіміра Караткевіча: ці (як) варта перачытваць школьны белліт? і дыскусію пра турэмную літаратуру з удзелам Уладзіміра Някляева, Алега Груздзіловіча і Таццяны Нядбай.
Для тых, хто не зможа прысутнічаць на мерапрыемствах ужывую, PRADMOVA прапануе магчымасць далучыцца да фестывалю ў анлайн-фармаце (21, 22 і 30 кастрычніка).